கிழக்கு அரச சேவை ஆணைக்குழு உறுப்பினர் நியமனம் மீளாய்வு செய்யப்பட வேண்டும்; கிழக்கு கல்வி நிருவாக அதிகாரிகள் சங்க செயலாளர் முக்தார் வேண்டுகோள்.!

-அஸ்லம் எஸ்.மெளலானா-

புதிதாக நியமனம் செய்யப்பட்டுள்ள கிழக்கு மாகாண அரச சேவை ஆணைக்குழுவின் உறுப்பினர் பட்டியல் மீளாய்வு செய்யப்பட்டு இலங்கை கல்வி நிருவாக சேவை மற்றும் சுகாதார சேவை என்பவற்றில் ஓய்வுபெற்ற அதிகாரிகளும் சட்டத்தரணி ஒருவரும் சேர்த்துக் கொள்ளப்பட வேண்டும் என்று இலங்கை கல்வி நிருவாக சேவை அதிகாரிகளின் கிழக்கு மாகாண சங்கத்தின் செயலாளர் ஏ.எல்.முகம்மட் முக்தார் கிழக்கு மாகாண ஆளுநர் பேராசிரியர் ஜயந்த லால் ரத்னசேகரவிடம் கோரிக்கை விடுத்துள்ளார்.

இது தொடர்பாக அவர் ஊடகங்களுக்கு கருத்து தெரிவிக்கையில்;

அரசியலமைப்பின் 13 ஆம் திருத்தச் சட்டத்தின் படி கல்வியும் சுகாதாரமும் மாகாண சபைகளிடம் முழுமையாக கையளிக்கப்பட்டுள்ள நிலையில் 2006 ஆம் ஆண்டுக்குப் பின்னர் கல்வி மற்றும் சுகாதாரத் துறைகளைச் சேர்ந்த ஓய்வுபெற்ற அனுபவம் வாய்ந்த அதிகாரிகள் கிழக்கு மாகாண அரச சேவை ஆணைக்குழுவுக்கு உறுப்பினர்களாக நியமிக்கப்படாது புறக்கணிக்கப்பட்டு வருவதானது மிகவும் கவலை தரும் விடயமாகும்.

2005 ஆம் ஆண்டுக்கு முன்னர் வடக்கு, கிழக்கு மாகாணங்கள் இணைந்திருந்த காலப் பகுதியில் அந்த மாகாண சபையின் அரச சேவை ஆணைக்குழுவில் ஓய்வுபெற்ற கல்விப் பணிப்பாளர்கள் மற்றும் ஓய்வுபெற்ற சுகாதார சேவை அத்தியட்சகர்கள் இடம்பெற்றிருந்தனர்.

ஆனால் 2006 ஆம் ஆண்டு வடக்கு கிழக்கு மாகாணங்கள் பிரிக்கப்பட்ட பின்னர் ஓய்வுபெற்ற சுகாதார சேவை அத்தியட்சகர்கள் புறக்கணிக்கப்பட்டு இலங்கை அதிபர் சேவையைச் சேர்ந்த கிழக்கு மாகாணத்தை சாராத தென் மாகாண சகோதர இனத்தின் அதிபர் ஒருவர் சுமார் 15 வருடங்களாக கிழக்கு மாகாண பொதுச்சேவை ஆணைக்குழு உறுப்பினராக கடமையாற்றினார்.

இந்நிலையில் தேசிய மக்கள் சக்தி ஆட்சிக்கு வந்த பின்னர் தற்போது நியமனம் செய்யப்பட்டுள்ள கிழக்கு மாகாண அரச சேவை ஆணைக்குழுவின் உறுப்பினர்களில் மூவர் ஓய்வுபெற்ற இலங்கை நிருவாக சேவை உத்தியோகத்தர்களாகவும் ஒருவர் தற்போது அரச சேவையில் உள்ளவராகவும் மற்றவர் ஓய்வுபெற்ற ஆசிரியருமாக மொத்தம் ஐவர் நியமனம் செய்யப்பட்டுள்ளனர்.

அரச சேவையில் மத்திய அரசின் கீழுள்ள அமைச்சொன்றில் தற்போதும் கடமையில் உள்ள ஒருவர் மாகாண பொதுச் சேவை ஆணைக்குழுவின் உறுப்பினராக கிழக்கில் நியமனம் செய்யப்பட்டுள்ளமை மாகாண சபைகளின் 35 வருட  வரலாற்றில் முதன்முறையாக இம்முறை இடம்பெற்றுள்ளது. இது தவறான முன்னுதாரணமாகும்.

மாகாண அரச சேவை ஆணைக்குழுவுக்கு உறுப்பினர்களை மாகாண ஆளுனர்தான் நியமனம் செய்கின்றார். இவர்களை ஆளும் அரசியல் கட்சி முக்கியஸ்தர்கள் சிபாரிசு செய்கின்றனர். வழமைக்கு மாறாக இந்த முறை கல்வி சுகாதாரத்துறை அதிகாரிகள் புறக்கணிக்கப்பட்டு இலங்கை நிருவாக சேவை உத்தியோகத்தர்களின் எண்ணிக்கை அதிகரித்துள்ளமை ஏற்றுக் கொள்ள முடியாததொரு விடயமாகும்.

ஆகையினால் கிழக்கு மாகாண அரச சேவை ஆணைக்குழுவின் தற்போதைய உறுப்பினர் பட்டியல் மீளாய்வு செய்யப்பட்டு இலங்கை கல்வி நிருவாக சேவை மற்றும் சுகாதாரத் துறைகளில் ஓய்வுபெற்ற அனுபவமுள்ள அதிகாரிகளும் சட்டத்தரணி ஒருவரும் சேர்த்துக் கொள்ளப்பட வேண்டும். இதன் மூலமே கிழக்கு மாகாணத்தின் அரச சேவை ஆணைக்குழுவானது முழுமை பெற்றதாக இருக்கும்.

மாகாண அரச சேவை ஆணைக்குழுவானது மாகாண அரச சேவையிலுள்ள அரச சேவையாளர்களின் பதவி உயர்வு, இடமாற்றம், ஒழுக்கக் கட்டுப்பாடு, நியமனம், மேன்முறையீடு என்பவற்றுக்கு பொறுப்பாகவுள்ளது.

கிழக்கு மாகாண சபையின் கீழ் கல்வித்துறை உத்தியோகத்தர்கள் என்ற வகையில் சுமார் 30,000 அதிபர், ஆசிரியர், கல்வி சாரா பணியாளர்களும் சுமார் 15,000 சுகாதார சேவை உத்தியோகத்தர்களும் கடமையாற்றுகின்றனர்.

தற்போதைய ஆளுனர் கல்வித் துறையில் ஆழ்ந்த அறிவுள்ள ஒரு பேராசிரியர் என்ற வகையில் எமது கோரிக்கையிலுள்ள நியாயத்தை விளங்கி நடவடிக்கை எடுப்பார்என நம்புகிறோம் - என்று மேற்படி சங்கத்தின் செயலாளர் முக்தார் மேலும் தெரிவித்தார்.

Advertisment 

கல்முனை மாநகர சபையின் பட்ஜெட்டுக்கு முன்மொழிவுகள் கோரப்படுகின்றன.!

-அஸ்லம் எஸ்.மெளலானா-

கல்முனை மாநகர சபையின் 2025ஆம் ஆண்டுக்கான வரவு- செலவுத் திட்டத்திற்கு பொது மக்களிடம் இருந்து ஆக்கபூர்வமான முன்மொழிவுகள் எதிர்பார்க்கப்படுவதாக மாநகர ஆணையாளர் என்.எம். நௌபீஸ் அவர்கள் அறிவித்துள்ளார்.

இதன் பிரகாரம் பொது நல அமைப்புகள் மற்றும் பொது மக்கள் எவராயினும் தமது முன்மொழிவுகளை எதிர்வரும் 2024.10.28 ஆம் திகதிக்கு முன்னதாக எழுத்து மூலம் சமர்ப்பிக்க முடியும் எனவும் அதன் பின்னர் சமர்ப்பிக்கப்படும் முன்மொழிவுகளை பரிசீலனைக்கு ஏற்றுக்கொள்ள முடியாத நிலை ஏற்படும் எனவும் அவர் தெரிவித்துள்ளார்.

கல்முனை மாநகர சபையின் அடுத்த ஆண்டுக்கான பட்ஜெட்டை தயாரிப்பதற்கான பூர்வாங்க நடவடிக்கைகள் ஆரம்பிக்கப்பட்டுள்ளன

இந்நிலையில், மக்களினதும் பொது அமைப்புகளினதும் ஆலோசனைகள் மற்றும் கருத்துகளை உள்வாங்கி சிறந்ததொரு சாத்தியப்பாடான பட்ஜெட்டை தயாரித்து, மாநகர சபையை முன்னோக்கி கொண்டு செல்ல வேண்டும் என்ற உயரிய நோக்கை அடிப்படையாகக் கொண்டு இவ்வாறு முன்மொழிவுகள் கோரப்படுவதாக ஆணையாளர் மேலும் குறிப்பிட்டுள்ளார்.

கல்முனை மாநகர திண்மக் கழிவகற்றல் வாகனங்களை துரிதமாக திருத்த நடவடிக்கை.!

-அஸ்லம் எஸ்.மெளலானா-

கல்முனை மாநகர சபையில் பழுதடைந்துள்ள திண்மக் கழிவகற்றல் சேவை வாகனங்களை துரிதமாக திருத்தி முடிக்குமாறு மாநகர ஆணையாளர் என்.எம். நௌபீஸ் பணிப்புரை விடுத்துள்ளார்.

கல்முனை மாநகர சபையின் திண்மக் கழிவகற்றல் சேவைக்குரிய வாகனங்களில் ஒரு கொம்பெக்டர் மற்றும் 04 உழவு இயந்திரங்கள் உட்பட 06 வாகனங்கள் பழுதடைந்திருக்கின்ற நிலையில் அவை திருத்தம் செய்யப்பட்டு வருகின்றன.

எனினும் குறித்த வாகனங்களின் திருத்த வேலைகள் தாமதமடைவதால் திண்மக் கழிவகற்றல் சேவையை முன்னெடுப்பதில் பாரிய அசெளகரியங்கள் ஏற்படுவதாக மாநகர சபையின் சுகாதாரப் பிரிவினர் மாநகர ஆணையாளரின் கவனத்திற்கு கொண்டு வந்திருந்தனர்.

இதையடுத்து வாகன திருத்தும் தளத்திற்கு இன்று கண்காணிப்பு விஜயம் மேற்கொண்டு நிலைமைகளை ஆராய்ந்த பின்னரே சம்மந்தப்பட்ட உத்தியோகத்தர்கள் மற்றும் இயந்திர திருத்துனர்களுக்கு ஆணையாளர் இந்த பணிப்புரையை விடுத்திருக்கிறார்.

இதன்போது வாகனங்களை திருத்தி முடிப்பதில் நிலவும் தாமதத்திற்கான காரணங்களை கேட்டறிந்து கொண்ட ஆணையாளர் அவற்றை துரிதமாக திருத்தி சேவையில் ஈடுபடுத்த வேண்டியதன் அவசியத்தை வலியுறுத்தியதுடன் இவற்றுக்கு தேவையான உதிரிப்பாகங்களை துரிதமாக கொள்வனவு செய்து வழங்குமாறும் திருத்துனர்களுக்கு தேவையான வசதிகளை ஏற்படுத்திக் கொடுக்குமாறும் சம்மந்தப்பட்ட உத்தியோகத்தர்களை கேட்டுக் கொண்டார்.

அதேவேளை பாவனைக்குதவாத வாகனங்களுக்கான Board of Survey அறிக்கைகளைப் பெறுவதற்குரிய நடவடிக்கை தொடர்பிலும் அவதானம் செலுத்தப்ப்பட்டது.

இதன்போது கல்முனை மாநகர சபையின் வேலைகள் அத்தியட்சகர் பி.ரி.எம். நஹீம், சுகாதாரப் பிரிவு பொறுப்பு உத்தியோகத்தர் டிலிப் நௌஷாட் உள்ளிட்டோரும் பிரசன்னமாகியிருந்தனர்.